Nagresulta sa trahedya ang dapat kuntani adlaw sang kasal sang 57-anyos nga lalaki matapos maaksidente ang ginasakyan nila nga minivan sang iya groomsmen sa Australia.
Suno sa report sang pila ka international news outlet, natabo ang aksidente sang Miyerkules, Hulyo 30, 2025 kun sa diin nahulog sa paubos nga bahin sang kilid sang karsada ang minivan nga ginasakyan sang mga biktima.
Sandig sa imbestigasyon sang mga otoridad, nagtiyog-tiyog sang pito ka beses ang minivan padulhog sang kilid sang karsada kun sa diin duha ang na-report nga kritikal samtang apat naman ang nabalhag nga nag-angkon sang minor injuries.
Kinahanglan pa suno diri maggamit sang helicopter ang rescue team agud mapaguwa ang groom sa salakyan matapos nga mag-angkon ini sang limb injuries kag gindala sa ospital. Isa pa ka lalaki ang kinahanglan man nga isakay sa chopper matapos man nga magkritikal tuga sang head injuries. Ginapatihan sang pulisya nga may kahilabtanan ang malain nga panahon sa natabo nga aksidente sa mga biktima.
Ginapahayag nga madanlog kag lutakon ang karsada kag wala man sang harang nga barriers ang kilid sini, rason agud mangin prone ini sa aksidente.
Natalana man nga ipaidalom sa alcohol kag blood testing ang driver sang minivan agud matumod kun may kahilabtanan ini sa nasambit nga aksidente samtang nagapatigayon man sila sang hiwalay pa nga imbestigasyon sa posible rason sang ila pagka-aksidente.
