ROXAS CITY– Paralisado ang transaksiyon sa tanan nga opisina sang Roxas City Hall bangud nadulaan ini sang suplay sang kuryente subong nga adlaw.
Ini matapos nga masunog ang main line sang kuryente malapit sa Kabalikat Civicom sang Roxas City Hall sa diin diutayan lang masunog ang nasambit nga edipisyo.
Suno sa Chief Electrician nga si Mr. Garry Bascos sang City Engineers Office, daan na ang nasambit nga mga linya sang kuryente bangud madugay na ini nga ginagamit.
Posible suno sa iya nga bwas pa magabalik ang linya sang kuryente bangud madugayan pa sila sa pagbaylo sang bag-o nga linya agud liwat masuplayan sang kuryente ang City Hall.
May ara man suno sa iya nga nakastand by nga generator ang gobyerno sang siyudad apang nautod man ang linya sini matapos malakip sa mga nasunog nga linya sang kuryente.
Mahibaluan nga nagtuga sang kaalarma sa mga residente ang madamol nga aso nga nagaguwa sa nasambit nga edipisyo apang gilayon man ini nga napalong sang Bureau of Fire Protection Roxas City Fire Station kag ila nadesisyunan nga utdon na lamang ang main line sang kuryente.
