ROXAS CITY – Kumpyansa ang Transparency and Accountability Task Force sa ila ginauyatan nga mga ebedensiya kag statement sang mga testigo may kaangtanan sa ginpasaka nga criminal complaint batuk kanday anay Pilar Mayor Gideon Ike Patricio, anak nga si incumbent Sangguniang Bayan (SB) member Mitchelle John Patricio, kag sa mag-asawa ngA Leonard Fernandez kag Ma. Paz Patricio-Fernandez sang Barangay Poblacion, Pilar, Capiz sa Office of the Ombudsman Visayas.
Ginpahayag ni Atty. Cris Heredia nga mabakud ang ila mga ebedensiya batuk sa pamilya sang anay alkalde sang Pilar nga nag-ugat sa pagdonate sang anak sang anay alkalde nga si Ma. Paz Patricio-Fernandez sa duta sa munisipyo nga ginbaton ni Ike Patricio nga ginpatindugan sang edipisyo sang LTO.
Apang natukiban sang Task Force nga anay nagaserbe nga Transition committee sang Perez administration nga may iregularidad sa nasambit nga transaksyon bangud kasunod sa pagclose sang propedad nag-execute sang affidavit of consolidation ang Quedancor, isa ka government institution.
Ginapanindugan pa sang task force nga wala sang kinamatarung nga magdonate sang duta si Patricio bangud void ang transaksyon sa una pa lamang.
