ROXAS CITY – Liwat nga igapatuman sang probinsiya sang Iloilo ang travel restrictions sa mga nagapadulong sa nasambit nga probinsiya.
Sandig sa ginpirmahan nga Executive Order No. 128-E ni Iloilo Governor Arthur Defensor Jr nga epektibo kahapon nga adlaw, indi na pagpahanugotan nga magsulod sa probinsiya sang iloilo ang mga indibidwal nga indi residente sang nasambit nga probinsiya magluwas gid lamang sa mga empleyado sang gobyerno, mga Health kag Emergency Frontliners, mga indibidwal nga nagabiyahe nga may kaangtanan sa humanitarian activities, mga indibidwal nga ginhatagan sang awtoridad nga magpadulong sa airport agud magbiyahe padulong sa luwas sang pungsod, mga Overseas Filipino Workers repatriates kag mga residente sang probinsiya sang Guimaras.
Samtang, ginahatagan naman tubtob buwas nga adlaw hulyo 3, 2020 ang mga residente sang probinsiya sang iloilo nga yara sa Capiz, Aklan, Antique, Negros Occidental kag Bacolod City nga makapauli sa nasambit nga probinsiya.
