ROXAS CITY– Sentro sang atensyon sa social media sa probinsiya sang Capiz kag kaingud nga probinsiya sa Western Visayas ang 32 anyos nga tricycle driver nga si Jerlo Anoche Villasoto sang Brgy. Ilaya, Ivisan, Capiz.
Posted by Sheila Joy Barza Alcantara on Wednesday, March 8, 2017
Ini matapos nagsikat bangud sa pag ilog-ilog sa mga bombo anchorman samtang kasubong nga nagaprograma sakay sa iya nga tricycle.
Kuha sini ang pamaagi sang paghambal sang mga Bombo anchorman sa pagsugod sang programa tobtob sa mga report.
Samtang yara sa tricycle, nagaserbe nga drum sini ang atup sang iya nga tricycle nga ginapukpok gamit screw driver.
Ginkuhaan ini sang video sang mga nalipay sa iya kag ginpost sa social media nga Facebook kag karon may yara na sang nilibo ka mga likes.
Sang gin-imbitahan sa progama sang Bombo Radyo, gindetalye sini nga humalin pa sang gamay siya, idolo na sini ang Bombo Radyo nga nangin inspirasyon sini agud ilog ilugon ang mga anchorman sini.
Kaupod ni Jerlo nga nagapangabuhi ang iloy kag utod nga iya ginatustusan pinaagi sa pagpamasahero sang traysikel.
Antes sini, nagtrabaho siya bilang kargador sang mga bato kag balas kag nangin traysikad driver.
Kun nahatagan sang tion nga maka-eskwela, luyag sini nga mangin pari kag brodkaster sa radyo.
Nahatagan sang tsansa si Jerlo nga makahambal sa mismo mikropono sang Bombo Radyo kag makahampak sang sikat nga sikat nga drum sang Bombo Radyo.
