ROXAS CITY – Pilas ang naangkon sang tricycle driver, matapos ginapahayag nga ginbuno sang construction worker sa Amado Lim Compound, Barangay X, Roxas City.
Ginkilala ang biktima kay Jesril Pangan, 23-anyos kag residente sang Sitio Ilawod, Barangay San Rafael, Dumalag Capiz, samtang ang ginapahayag suspek ang ginkilala kay Reynold Abisan, 24-anyos kag residente sang Sitio Pamantawan, Barangay Mianay, Ivisan Capiz apang temporaryo nga nagapuyo sa Amado Lim Compound, Barangay X, sining syudad.
Sa impormasyon nga nakuha sang Bombo Radyo sa Roxas City PNP, ginapahayag nga samtang nagahugas sang iya tricycle ang biktima hinali na lamang ini nga ginpalapitan sang suspek kag ginkompronta rason nga may nagluntad nga mainit nga diskusyon sa tunga sang biktima kag suspek kag hinali na lamang nga ginbuno sang suspek ang biktima.
Bangud sini nag-angkon sang pilas sa liog ang biktima nga madasig naman ginpadangat sa pribado nga ospital agud dapatan sang nagakaigo nga pagbulong.
Samtang ang suspek naman yara sa kustodiya sang Roxas City PNP, para sa nagakaigo nga disposisyon.
