ROXAS CITY – Dismayado ang isa ka pasahero matapos nga ginsukot ini sang tricycle driver sang P50 nga plete halin sa Roxas Avenue padulong sa Barangay Lawa-an, Roxas City.
Sa interview sang Bombo Raydo kay Mr. Gonzalo Andrada, Traffic Management Unit Head, iya ginpahayag nga nagpadulong sa ila talatapan ang isa ka ginang kag ginreklamo ang isa ka tricycle driver nga si alyas Edgardo residente sang Brgy. Dayao sini nga syudad.
Suno kay Andrada nga gintuad sang ginang nga nagpanukot sang sobra-sobra ang amo nga tricycle driver sa diin ginsukmaan pa ini sang tricycle driver kag nagsabtanay ang duha, tubtob nga nagpanaog nalang ini sa tricycle.
Gilayon nga ginpatawag sang talatapan sang TMU ang amo nga driver kag ginpahayag sini nga nagpasugot man suno diri ang iya pasahero nga sukton siya sang sobra.
Nahibaluan nga sandig sa ordinansa, ginadumilian ang overcharge nga pagsukot sang plete sa mga pasahero bangud magapangatubang ini sa paglapas nga ‘arrogance and discourteous towards passenger’ nga may nagakaigo nga penalidad.
Pahanumdom ni Andrada sa mga pasahero nga kun maka-eksperyensya sang kaangay nga hitabo, mas maayo nga kuhaan sang litrato ang tricycle lakip ang city number kag mas maayo nga indi magsakay sa colorum agud madasig nga madakpan ang ginareklamo nga tricycle driver.
Samtang, panugyan naman sini sa mga driver nga insaktuhon ang pagsukot sang plete kag likawan ang pagpangbastos sa mga pasahero kaangay nalang sang mga personal nga pamangkot.
– With a report from Bombo Jessa Delos Santos
