Patay ang apat ka tawo lakip na ang isa ka bata nga lalaki samtang 29 naman ang pilason matapos makabunggo ang ila ginasakyan nga truck sa isa ka multicab sa Aleosan, Cotabato sang Sabado de Gloria.
Padulong kuntani sa outing ang mga sakay sang truck.
Sandig sa Cotabato Police, natabo ang insidente sa Cotabato-Davao Highway sa Barangay San Mateo, Aleosan.
Sa imbestigasyon, ang driver sang Elf truck naga-edad 55-anyos kag padulong sa Cotabato City sang matabo ang trahedya.
Sa imbestigasyon sang Aleosan Municipal Disaster Risk Reduction and Management Office kag mga officials sang Cotabato Provincial Police Office, nadulaan sang control sa manibela ang truck driver sang nag-overtake ini sa isa ka motorsiklo apang gulpi nag-ulhot ang isa ka pick up type nga multicab halin sa pihak nga direksyon sang highway malapit sa crossing sang Barangay Mingading.
Bangud sini, nagbunggo ang truck nga puno sang pasahero sa center island kag nagbunggo man sa multicab.
Sa mabaskog nga pagkabunggo, nagtakilid ang truck, nagtabog kag naipit pa ang mga sakay sini nga masobra 30 ka tawo.
