Gin-anunsiyar ni US President-elect Donald Trump ang iya paghamtang sa heart surgeon kag TV personality nga si Dr. Mehmet Oz ukon mas kilala sa panawag bilang “Dr. Oz” agud pamunuan ang US Centers for Medicare and Medicaid Services.
Ang nasambit nga federal agency nga ginapamunuan ni Oz ang isa ka federal agency nga nagahatag sang health coverage sa masobra 160 million Americans, halos katunga sang populasyon sang pungsod.
Sa isa ka statement, ginsiling ni Trump nga nakilala sini si Dr. Oz sa sulod sang madamo nga tuig kag kumpiyansa sini nga siguruhon ni Oz nga makabaton sang pinakamaayo nga Healthcare ang tanan nga pumuluyo sang Amerika agud mangin masulhay liwat ang ila pungsod.
Ginhayag man ni Trump nga si Dr. Oz ang mangin isa ka lider sa pag-insentibo sa Disease Prevention agud mangin pinakamaayo nga resulta sa bilog nga kalibutan para sa kada dolyar nga ila ginhatag para sa healthcare sa Amerika.
Maluwas diri, ginpunggan man suno ni Oz ang “waste at fraud” sa sulod sang pinakamahal nga Government Agency sa ila pungsod nga one-third sang ila pondo sa Healthcare kag one-fourth sang kabug-usan nga National Budget.
Dugang pa ni Trump nga nagapangatubang sa karon ang Amerika sa Healthcare crisis kag wala sang iban nga Physicial ang mas kwalipikado kag may ikasarang nga sobra pa kay Oz agud himuon nga malusog liwat ang Amerika.
Matandaan nga nauna na man nga ginpahamtang ni Trump sa iya una nga termino bilang Presidente si Oz sang 2018 sa Presidential Council on Sports, Fitness and Nutrition kag liwat nga ginhamtang sa nasambit nga posisyon sang 2020.
