Magapungko sa isa ka victim interview sang Federal Bureau of Investigation (FBI) si anay US President nga sa karon Republican presidential nominee Donald Trump.
Ini ang may kaangtanan sa assassination attempt sa iya samtang yara ini sa campaign rally sa Pennsylvania sadtong Hulyo 13.
Wala naman naghatag sang petsa ang FBI kun san-o ipatigayon ang nasambit nga inteview apang ginapahayag nga patigayunon ang standard victim interview kay Trump kasubong sang ginahimo nila sa iban nga biktima sang krimen.
Suno kay FBI special Agent Kevin Rojek nga luyag nila nga makuha ang perspektibo ni Trump nga naobserbahan sini sang matabo ang pagpangluthang.
Sa pihak naman sang bastante nga ebidensiya, blangko sa gihapon ang mga imbestigador sa motibo sang napatay nga suspek nga si Thomas Matthew Crooks.
Samtang, sa ginpaguwa nga bag-o nga impormasyon, nabuyagyag nga nasiplatan ang 20-anyos nga suspek sang isa ka local Swat team masobra 90 minutos antes natabo ang assassination attempt, mas timprano ini kaysa sa nauna nga report.
Nakadugang naman ini sa listahan sang security failures sang Secret Service nga naglab-ot sa assassination attempt batuk sa anay pangulo sang Amerika.
Sang damlag lang, ginpahayag sang FBI nga nagapati ang mga imbestigador nga maid-id nga ginplanohan ni Crooks ang krimen antes ang Hulyo 13 rally kag nagpatigayon sang significant efforts agud matago ang mga aktibidad sini kalakip ang pagbakal sang 6 nga components sang pangpasigabong.
