Nagdeploy si Presidente Donald Trump sang Estados Unidos sang 2,000 ka National Guard troops sa Los Angeles agud atubangon ang kalakasan nga gintuga sang mga protesta bangud sa immigration enforcement raids.
Ang White House nagsiling nga ini kabahin sang kampanya sa pagtapos sang “lawlessness.” Apang si California Governor Gavin Newsom nagsiling nga ang pag-deploy sang National Guard mahimo nga magdugang pa sang tensyon, nga nagasiling nga ang mga lokal nga gobyerno maka-uyat sang sitwasyon.
Ang mando nag-abot pagkatapos sang duha ka adlaw nga bayolente nga engkwentro sa tunga sang mga demonstrador kag US federal agents sa diin ang mga otoridad naggamit sang tear gas kag flash-bang grenades, samtang ang mga protesters naghaboy sang mga palupok kag mga bato. Ginsunog man ang mga salakyan kag ginbarikadahan sang mga shopping cart kag sako sang semento ang mga dalanon.
Nagpaandam ang US Defense Secretary nga kon maglala ang sitwasyon, mahimo nga maggamit ang gobyerno sang mga aktibo nga military personnel, lakip na ang mga Marines sa Camp Pendleton.
Samtang, nag-apelar ang LA Mayor Karen Bass para sa kalinong, apang nagsiling nga ang kasingki may dala nga responsibilidad.
Dugang pa niya nga samtang ang kahilwayan sa pagpahayag isa ka kinamatarong, wala ini nagalakip sang kinamatarong sa pagtublag, pag-atake, kag pagguba sang propiedad.
