Gin-anunsyo ni US President Donald Trump ang panibag-o nga pagpatupad sang taripa batuk sa anom ka pungsod, kalakip ang Pilipinas.
Suno sa ginpaguwa nga opisyal nga sulat gikan sa White House, ginpadalhan sang abiso ang mga pungsod nga Algeria, Brunei, Iraq, Libya, Moldova, kag Pilipinas kaangut sang bag-o nga tikang pang-ekonomiya.
Nakasaad sa sulat nga papanaugan sang 30 porsyento nga taripa ang mga produkto nga gikan sa Algeria kag Iraq. Samtang, 25 porsyento naman ang ipatuman sa mga produkto gikan sa Brunei, Libya, kag Moldova. Ang Pilipinas papanaugan man sang 20 porsyento nga taripa.
Ipatuman ang bag-o nga patakaran halin Agosto 1 subong nga tuig, kasunod sang pagtakop sang 90 ka adlaw nga negotiation period. Sasini nga tion, may kahugayunan ang mga apektado nga pungsod nga makighinun-anon sa American government agud bag-uhon ukon i-atras ang desisyon. apang, gin-athag ni Trump nga indi na pagpalawigon pa ang deadline sang negosasyon.
Matandaan nga sadtong Lunes lamang, gintalana man ni Trump ang 25 porsyento nga taripa sa mga produkto nga nagikan sa Japan kag South Korea.
