UNITED STATES-Ginpunggan sang isa ka federal judge sa United States ang pagpatuman sang bag-o nga executive order ni US President Donald Trump nga nagalimit sa sin-o ang kwalipikado nga mangin American citizen paagi sa birthright citizenship.
Si US District Judge Deborah Boardman sang Maryland nagpagwa sang preliminary injunction matapos ang paghangkat sang mga grupo nga nagadepensa sa katungod sang mga imigrante batok sa executive order nga ginpirmahan ni Trump sang Agosto 6.
Suno sa hukom, ang mga kabataan nga sakop sang gin-certify nga grupo amo gihapon ang may katungod nga mangin US citizens halin sa ila pagkatawo. Ginkabig man niya nga “almost certainly unconstitutional” ukon malapit gid nga supak sa Konstitusyon ang bag-o nga mando sang presidente.
Ang executive order ni Trump nagatutok sa iya ginatawag nga “birth tourism,” ukon ang pagsulod sang mga tawo sa US nga kuno nagapakuno-kuno lamang nga turista apang ang tuyo amo ang pagpanganak didto agud mangin US citizen ang ila kabataan.
Ini ang ikaduha nga tikang sang Trump administration batok sa birthright citizenship. Sa iya una nga executive order, ginpangabay ni Trump nga indi awtomatik nga mangin US citizen ang mga kabataan nga natawo sa US kun ang ila ginikanan yara ilegal sa pungsod ukon temporary visa lamang.
Apang ginpunggan ini sang mga lower court kag sang ulihi, ginpaboran man sang US Supreme Court ang prinsipyo nga yara sa 14th Amendment, nga nagahatag sang citizenship sa halos tanan nga tawo nga natawo sa US soil.
Ginpasalamatan naman sang mga immigrant rights groups ang bag-o nga desisyon sang korte, samtang ginpahayag nila nga liwat nga napaslawan ang administrasyon ni Trump sa paglimitar sang birthright citizenship.
Kabahin ang kampanya batok sa birthright citizenship sa mas malapad nga immigration policy ni Trump, nga nagalakip sang pag-deport sang milyon-milyon nga undocumented migrants kag pagkuha sang deportation protections sang mga pumuluyo sang pila ka pungsod.
