Magapatigayon sang una nga hearing ang Truth Commission nga gintukod agud magdokumento sang mga alegasyon sang extrajudicial killings ukon EJK nga may kaangtanan sa drug war sang administrasyon ni anay Presidente Rodrigo Duterte.
Ginalauman nga himuon ang una nga hearing bwas, Biyernes, Agosto 14, sa Pope Pius Center sa Manila.
Suno kay Atty. Raul Pangalangan, chairperson sang komisyon, ila pamatian ang mga biktima kag pamilya sang mga napatay kag tipunon ang impormasyon tuhoy sa mga insidente.
Si Pangalangan ang isa ka anay hukom sang International Criminal Court (ICC) kag anay dean sang University of the Philippines College of Law.
Ginpahayag niya nga gintukod ang komisyon matapos ang panawagan ni Kalookan Bishop Pablo Virgilio Cardinal David sang Nobyembre sang nagligad nga tuig.
Ang Truth Commission separado sa ICC kag indi man ini parte sang gobyerno sang Pilipinas.
Gintukod ini sang Catholic Church kag civil society organizations.
Wala ini sang gahum nga magpasaka sang kaso ukon magdesisyon bilang korte.
Pahayag niya, mahimo man nila mabatian ang mga kaso nga wala nasakop sang hurisdiksyon sang ICC.
Nagapanguna nga katuyuan sang komisyon ang pagpamati sa mga biktima, pagdokumento sang ila mga eksperyensya kag pagtipon sang mga impormasyon agud mahimo nga isa ka pormal nga report.
Mahimo man nila ipasa ang mga ebidensya kag findings sa nagakaigo nga ahensya sang gobyerno kag international human rights organizations para sa posible nga tikang.
Ginpahayag man ni Pangalangan nga bukas ang komisyon sa pagpamati sa tanan nga bahin, lakip na ang mga opisyal sang gobyerno kag iban pa nga mga indibidwal nga may impormasyon ukon luyag nga maghatag sang ila sentimyento sa mga natabo sadto.
Isa sa mga kaso nga pagaistoryahan sa una nga hearing amo ang kaso ni Raymart Siapo, 19-anyos nga lalaki halin sa Navotas nga napatay sang 2017 matapos ginaalegar nga gin-akusaran nga nagabaligya sang marijuana.
Ginalauman nga ipresentar sa hearing ang resulta sang forensic examination sa lawas ni Siapo.
Ginatipon man sang komisyon ang iban pa nga impormasyon, lakip ang mga report sang gobyerno, mga balita sa media kag mga rekord halin sa mga organisasyon nga nagabulig sa mga biktima.
Ginpanginwala ni Pangalangan ang alegasyon nga katuyuan sang Truth Commission nga pagpakalain ukon pag-demonize sang bisan sin-o nga partido.
