Nagapanawagan sang bulig sa Philipine Embassy ang isa ka Pinay nga tumandok sang probinsya sang Capiz nga makapuli na sa Pilipinas.
Ini matapos ma-stranded sa pungsod Bahrain bangud sang nagalala nga tensyon sa tunga sang Iran kag Israel.
Suno kay Bombo Ahmyzza Contreras, International correspondent direkta sa Bahrain, iya ginpahayag nga tuman nga kahadlok ang iya nabatyagan bangud sa asud-asud nga lupok sang missiles kag rockets sa palibot.
Pahayag pa niya ,ginakabig na sini bilang ikaduha nga kabuhi ang iya pagkaluwas matapos nga maigo ang building nga iya una nga ginahamtangan.
Dugang pa sini, wala siya sang bisan ano nga gamit nga nabitbit bangud sang tuman nga kahadlok tuga sang pagsigabong.
Nagapasalamat man ini sa mga Chinese nga nagbulig kag nagsapupo sa iya.
Sa subong, nagakabalaka ini sa ila seguridad sa sulod sang hotel nga ila ginatiniran bangud may nakalab-ot nga impormasyon nga ang nasambit nga mga imprastraktura ang masunod nga target.
Nagapanawagan ang natungdan sa Philippine Embassy kag sa gobyerno sang Pilipinas nga mahatagan sila sang bulig sa sa labing madali nga panahon agud nga makahalin sila kag luwas nga makapangita sang mas safe nga lugar.
