PONTEVEDRA, CAPIZ- Nangin madinalag-on kag nakuha ang Top 8 sa Interior Designers Licensure Exam 2025 sang isa ka nagpasimpalad nga tumandok sang banwa sang Pontevedra, Capiz.
Sa interview sang Bombo Radyo kay Marben East C. Bonifacio, Top 8 Passer- Interior Designers Licensure Exam 2025, iya ginpahayag ang sekreto padulong sa iya nga kadalag-an.
Suno sa iya, kun may dako nga handom ang isa ka tawo, kinahanglan sini nga mag-set sang system agud mahimo nga mangin guidelines nga amo ang pagasundan sa paglab-ot sang amo nga handom.
Dugang pa sini nga, bangud sa amo nga teknik nga iya ginasundan, nakuha nya ang amo nga kadalag-an apang, ang luyag nya lang kuntani amo ang makapasar kag wala nya ginalauman nga may bonus pa kag amo ang mangin Top 8 sa nasambit nga exam.
Mensahe sini sa mga kaangay nya nga nagahandom nga makapasar sa exam nga ipadayon ang pagtimakas kag indi gid magkalipat sa pagpangamuyo sa mahal nga Dyos agud nga masiguro gid nga mamag-an ang pamatyagan sa kun ano man ang mangin resulta sang exam.
Interviewed by Bombo Francis Biñas and Bombo Sunnie Mae Batencila
