ROXAS CITY – Ginkumpirmar ni Ms. Amy Judicpa, OIC sang Department of Labor and Employment (DOLE) – Capiz, nga nagapadayon ang implementasyon sang Tulong Panghanapbuhay sa Ating Disadvantaged/Displaced Workers (TUPAD) program sang ahensiya sa probinsya.
Sa interview sang Bombo Radyo kay Judicpa, ginpahayag sini nga wala ini sang gahum nga makapauntat sa programa sang national government.
Ini ang nangin sabat ni Judicpa matapos nga nakabaton ini sang imbetasyon kag nagtambong sa sesyon sang Sangguniang Panlalawigan sang Martes, matapos ang hinyo sang Sanggunian nga temporaryo suspendihon ang implementasyon sang TUPAD bangud sa pila ka mga ginaalegar iregularidad.
Sa pihak nga bahin, aminado ang tagdumalahan sang DOLE-Capiz nga nakalab-ot sa ila talatapan ang alegasyon nga pagpasulod sa mga indi kuwalipikado sa programa, apang kun mag-conduct na sila sang imbestigasyon, wala na sang nagatindog nga nagahatag sang impormasyon.
Ginpunto man ni Judicpa nga ginabawi nila ang pasuweldo sa resipyente kun mapamatud-an nga indi ini kuwalipikado, kaangay nalang sa isa ka resipyente nga luyag lang sini nga magbaton sang kuwarta apang indi luyag magtrabaho.
Liwat nga ginpahayag ni Judicpa nga ang kuwalipikado lamang sa programa amu ang mangunguma, mangingisda, magagmay nga vendors, drivers ukon mga labing naapektuhan sang pandemya.
Indi naman kuwalipikado ang mga government workers kag officials, Barangay Health Workers, Officials kag Tanod.
Nahibaluan nga sumugod sang Hunyo 5, P450 na ang inadlaw nga suweldo sang TUPAD beneficiaries, nga magatrabaho sa sulod sang minimum nga napulo ka adlaw.
