Nabawi sang University of the Philippines ang korona sa ila homecourt matapos palayason sa trono ang De La Salle University sa iskor nga 66-62 sa do-or-die Game 3 sang UAAP Season 87 men’s basketball tournament nga gimhampang sa Araneta Coliseum kagab-i.
Nagtingub-puwersa sanday graduating student JD Cagulangan, Francis Lopez kag Quentin Millora-Brown agud alalayan ang Fighting Maroons sa dikitanay nga hampang sa ulihi kag makuha ang kampeonato sa ila best-of-three showdown.
Abanse sang isa ka puntos ang UP sa iskor nga 61-60 sa 1:31 mark sa fourth canto, nagtay-og ang ang Big Dome sa ginpasulod ni Lopez ang tres agud uyatan ang 64-60 nga bentaha.
Nabuhinan pa sang La Salle ang abanse sang UP, sa iskor nga 62-64 may 46 segundos pa ang nabilin, apang ginmarkahan ni Millora-Brown ang kadalag-an sang Diliman squad sang ginsulod sini ang duha ka free throw.
Nakalsuhan sang Fighting Maroons ang duha ka season nga first runnerup nga puro nadasok sa Game 3 ang hampang gani ginalauman nga manami sa ila pamatyagan ang pagbalik sang titulo sa ila eskuwelahan.
Nauyatan sang Fighting Maroons ang lima nga puntos nga bentaha, 21-16 matapos ang ila 11-0 run nga may 45 segundos na lang sa first canto, apang napabilin ang kapag-on sang Green Archers kag napatas nila ang iskor sa 21-all pasulod sang second period.
Mainit nga ginsuguran sang Green Archers ang fourth quarter sang ipatas nila ang iskor sa 58-all may 7:11 minutos pa sa orasan apang determinado ang Fighting Maroons nga makuha ang korona matapos ginsulod ni Cagulangan ang pamatay nga tres para uyatan ang tatlo ka puntos nga abanse kag ginpahugot na lamang nila ang ila nga depensa tubtob sa maubos ang oras.
