Kada Marso kag Abril, makit-an sa Central Highlands sang Vietnam ang pinasahi nga ingredient sa ila nga local cuisine, ini amo ang cassia caterpillar.
Ginpahayag nga sa sini nga tyempo, ginasalakay sang mga insekto ang mga puno sang cassia, kag antes pa sila dalayon nga mangin alibangbang, ginakolekta ang mga ini sang mga residente agud lutuon kag kaunon.
Suno sa mga lokal, buhi ang mga caterpillar ukon ulod nga ginasulod sa isa ka bulutangan sa sulod sang apat tubtob anom ka oras agud makakas ang unod sang ila nga tiyan.
Pagkatapos ginahugasan kag ginabanlawan sang nagabukal nga tubig. Sunod, ginigisa ini sa mantika, ahos, sibuyas, kag asin.
Ginadugangan ini dayon sang ginhiwa nga dahon sang dayap bilang seasoning.
Apisar may mga naga-serve sini nga inihaw, mas naandan ang paggisa. Ang finish product sini ang may mahagpok nga panit kag mayum-ok nga unod, kaangay ini sa silkworm apang may mas mananam nga sabor kag indi masyado nga mantikaon.
Sa pihak sang pagiging weird nga sud-an, ginakabig ini nga manamit sang kadam-an nga lokal nga residente sang Central Highlands.
Bangud sa limitado nga panahon sang patubas, mataas ang presyo sang cassia caterpillar. Sa Central Highlands, naglab-ot ini sa VND 200,000–250,000 kada kilo (kabaylo sang P460–P580), kag mas mataas sa iban nga rehiyon nga nagalab-ot sa VND 350,000–400,000 kada kilo (P805–P920), nga kabaylo sang presyo sang pila ka sahi sang seafood.
Apang, may na-report nga pila ka tawo ang nag-angkon sang allergic reaction matapos nagkaon sini, kasubong sang pagpangatol sang panit.
Sa pihak sang amo nga report, padayon ini sa gihapon nga ginasakdag bilang kabahin sang lokal nga kultura sa nasambit nga rehiyon.
