Nasunog ang mismo nga pavilion area kun sa diin nagapatigayon sang United Nation talks ukon 30th UN Conference of the Parties (COP30) sa Belém, Brazil.
Suno sa UN nga amo ang nagadumala sang Conference of the Parties climate meetings, napatay ang sunog makaligad ang anum ka minutos kag 13 ka mga tawo ang ginbulong bangud sa paghaklo sang aso.
Nagresulta man ini sa pag-evacuate sang madamo nga delegasyon nga nagtambong sa summit. Linibo man ka mga tawo ang nagtambong sa UN climate talks lakip ang mga katapo sang mga delegasyon gikan sa halos 200 ka mga pungsod.
Nagpatigayon namn sang inspection ang bombero sa lugar agud mahibaluan ang kaluwasan kag temporaryo nga gin-take over sang mga otoridad sang Brazil ang summit.
Sa subong, wala pa mahibaluan kun ano ang gintunaan sang sunog, apang base sa mga testigo nga gin-interview sang international media, posible nga electrical fire ang gintunaan sang sunog. Nahibaluan nga yara na sa katapusan nga mga oras ang pag-istoryahanay agud mag-ugyon sa masunod nga mga tikang agud istoryahan ang isyu sang climate change sang nagluntad ang sunog rason nga na-delay ang negosasyon.
