Madinalag-on nga nasaylo kag na-exhibit sa Louvre Abu Dhabi sa United Arab Emirates ang obra maestra ni Juan Luna nga “Una Bulaqueña” suno sa National Museum of the Philippines.
Ang seremonya gintambungan nanday His Excellency Mohamed Khalifa Al Mubarak sang Louvre Abu Dhabi, Philippine Ambassador Alfonso Ver, kag Jorell M. Legaspi sang National Museum.
Sa pihak nga bahin, makita sa artwork ang isa ka babaye nga taga-Bulacan nga nagasuksok sang traditional attire nga nagapakita sang katahum kag dignidad sang isa ka Filipina.
Ginakilala man ini bilang isa ka madinalag-on nga pagpasundayag sang arte sang mga Pilipino bangud sang iya estilo-Europa nga artwork.
Ang “Una Bulaqueña” nalakip sa eksibit upod ang mga obra nanday Auguste Renoir kag Édouard Manet.
Gindeklarar ini nga isa ka National Cultural Treasure sang 2008 kag isa sa pinakapalangga nga mga obra sang arte sa pungsod.
Ginhatagan pagtamod ni Ver nga ang ini nga exhibition nagapakita sang nagabaskog nga relasyon sa tunga sang Pilipinas kag UAE.
Samtang, ang “Una Bulaqueña” magapabilin sa Louvre Abu Dhabi tubtob sa Hunyo 2026.
