ROXAS CITY – Madinalag-on kag produktibo ang una nga 100 diyas nga pagpanerbisyo ni Governor Fredenil ‘Oto’ Castro sa bug-os nga probinsya sang Capiz.
Sa ginhiwat nga first 100 days report sang gobernador sa Session Hall sang Sangguniang Panlalawigan sa Kapitolyo, ginakalipay ni Gov. Castro nga ginpakigbahin ang iya nahimuan sa probinsya. Suno diri ang tanan nga mga promisa nga ginbuy-an niya sang siya pa lang ang nagakampanya, iya ini tumanon para sa mga Capiznon.
Isa sa mga accomplishment sini ang paghatag sang sweldo sa mga nagatrabaho sa Roxas Memorial Provincial Hospital (RMPH) nga wala nahatagan sang sweldo sang nanligad nga administrasyon sang pila ka bulan.
Nareinstate man sa trabaho ang 36 ka mga job order kag casual workers sa amu nga ospital.
Maluwas diri, ginpasakaan man sang gobyerno probinsyal ang sweldo sang mga nurses nagikan sa P11,00o magabaton na ini sang P20,000. Indi lamang health workers ang nagtaas ang sweldo amu man ang mga job hire nga nagatrabaho sa kapitolyo nga dati nagasweldo sang p250 kada adlaw.
Aminado naman ang gobernador nga indi bastante ang amu nga sweldo para sa mga healthworkers apang suno diri pinaagi niya ini agud mabatyagan sang mga nurses nga may yara sang balatyagon ang bag-o nga nagapungko nga administrasyon.
Ginkalipay man sini nga ginpakigbahin nga ang Capiz ang ikaduha nga probinsya sa Western Visayas nga may pinakamanubo nga kaso sang COVID-19.
Suno diri, maid-id nga ginatun-an sang medical society ang pamaagi kag proseso agud malikawan ang COVID-19 kag malikawan ang paglapnag sang balatian nga dengue.
Sa pihak nga bahin, ginsiling ni Castro nga malapit na malab-ot sang RMPH ang handum nga mga kagamitan bangud nalakip ini sa 2022 budget para sa pagpaayo sang serbisyo sa mga pumuluyo.
Nagapati ini nga madamo pa ini sang mapamatud-an kag ipabatyag sa mga Capiznon ang may yuhom kag balatyagon nga pagdumala sa probinsya.
