ROXAS CITY – Nangin matalunsay ang una nga adlaw sang limited face-to-face classes sa Capiz National High School (CNHS).
Ini ang ginsiling ni Mrs. Rita Villareal, Principal sang CNHS sang mapakig-angutan sang Bombo Radyo.
Nagapasalamat siya bangud nagkooperar ang mga estudyante kag ginikanan sa mga ginapatuman sang nasambit nga buluthoan agud mapabilin ang ila ikaayong lawas.
Suno kay Villareal, makit-an nga madamo gid ang nahidlaw sa f2f class bangud temprano pa nagpadulong ang mga estudyante.
Ginpat-od sini nga kapin 6,226 ang populasyon sang CNHS sang nakaligad nga tuig kag nagalaum siya nga magadamo pa ang numero sang mga kabataan bangud sa padayon pa tubtob sa karon ang enrollment rason man nga gin-adaptar sang ila buluthoan ang blended learning kun sa diin 3 ka adlaw nga f2f class kag duwa ka adlaw naman sa modular ukon online class.
Hugot man ang ila pagpatuman sang minimum health protocols sa mga manunudlo kag estudyante kun sa diin may yara sang handwashing area, temperature check kag alcohol sa kada classroom, kag para naman sa social distancing naka-one seat apart ang mga bangko kag ginpakamaayo nga tungaon ang pag-eskwela sang mga grade levels kun sa diin sa aga ang grade 7, 9, 11 samtang sa hapon naman ang grade 8, 10, kag 12.
Wala paman suno diri nagsugod ang pormal nga klase kag magapokus subong nga semana sa introduction kag psychosocial sang mga estudyante.
