ROXAS CITY –— Ginkanselar na ang klase sa Panitan National High School matapos sunod sunod nga nalipong ang masobra sa 40 ka mga estudyante kaina sang aga.
Suno kay Panitan Mayor Generoso Derramas kinahanglan nga kanselahon ang klase sa nasambit nga buluthuan tobtob wala pa nahibaluan kun ang gintunaan sang nagakahinabo sa mga kabataan.
Nahibaluan nga kahapon kapin sa 60 ka mga estudyante ang gindala sa rural health center kag iban nga ospital sa probinsiya matapos nga naglain ang ila pamatyag kag madamo ang nalipong kasunod sang ginpatigayon nga earthquake drill.
Ginapatihan sang pila ka mga ginikanan nga gin-engkanto ang ila mga anak bangud posible nga naestorbo ang nagapuyo nga engkanto sa daku nga puno sang akasya sa sulod sang eskwelahan.
Palamangkutanon man nga tanan nga ginapossess ang mga babaye nga estudyante.
Naobserbahan man ang pagwaras sang amo nga mga estudyante kag kasubong nga ginapossess sila sang malain nga espisitu bangud indi masarangan sang tatlo tobtob apat ka tawo ang isa ka estudyante nga isakay sa ambulansiya.
Suno naman sa pila ka mga estudyante nga na-interview sang Bombo Radyo, may nakita sila nga katanhagaan sa 2nd floor sang isa ka edipisyo sa buluthuan nga naghatag sa ila sang tuman nga kahadluk.
Samtang suno naman sa pila ka mga doktor nga nagtsekyar sa mga pasyente nga mahimo mass hysteria ang nahinabo rason nga ini kadamu ang mga estudyante nga nalipong.
Nag-abot naman sa eskwelahan ang pila ka religious group gikan sa simbahan agud ipangamuyo ang mga estudyante.
