Ginreport sang US Ambassador to Israel Mike Huckabee sang Lunes nga partially damaged ang building sang US Embassy branch sa Tel Aviv matapos nga naigo sang Iranian missile malapit sa ila lugar, apang ginpasalig sini nga wala sang personnel nga napilasan.
Madumduman nga natabo ang pag-atake matapos nga ginbombahan sang Israel ang mga military targets sa sulod sang Iran, sa diin madamo nga mataas nga opisyal kag siyentipiko ang ginpahayag napatay, rason nga nagbalos ang Iran paagi sa serye sang missile strikes sa nagkalain-lain nga mga syudad sang Israel, lakip na ang Tel Aviv.
Temporaryo nga ginsirado ang US Embassy sa Jerusalem, samtang yara pa ini sa alerto kag may yara sang “shelter in place” nga mando para sa mga empleyado.
Samtang, nahibaluan nga ginpahayag sang isa ka mataas nga opisyal sang Estados Unidos nga ginpauntat ni US President Donald Trump ang plano sang Israel nga patyon ang Iranian Supreme Leader Ayatollah Ali Khamenei.
Nagakabalaka ang mga eksperto nga ang karon nga tensyon mahimo magdul-ong sa mas malapad nga inaway sa Natung-an nga Sidlangan.
