Gin-untat sang Amerika ang halos tanan nga foreign aid sini suno sa internal memo nga ginpadala sa mga opisyal kag US embassies sa nagkalain-lain nga mga pungsod.
Ini ang kasunod sang gin-isyu nga executive order ni US President Donald Trump sadtong Lunes para sa 90 ka adlaw nga pag-untat sang foreign development assistance samtang naka-pending pa ang pagtuon sa pagiging episyente kag consistency sini sa foreign policy ni Trump.
Mahibaluan nga Amerika ang ginakabig nga pinakadaku nga international aid donor sa bug-os nga kalibutan nga nagdonar sang $68 billion sadtong 2023.
Gani ginalauman nga maapektuhan sang pagpa-untat sang foreign aid gikan sa US ang tanan gikan sa development assistance tubtob sa military aid.
Apisar may exceptions diri kalakip ang emergency food aid kag military funding para sa Israel kag Egypt.
Nakasaad man sa nag-leak nga memo nga wala sang bag-o nga pondo nga igapain para sa mga bag-o nga awards ukon extension sang existing awards tubtob sa dalayon nga ma-review kag maaprubahan na ang kada plano nga bag-o nga award ukon extension.
Ginmandu man sa nasambit nga executive order ni Trump ang lapnagon nga pagsiyasat sa tanan nga foreign aid nga dapat makumpleto sa sulod sang 85 ka adlaw para masiguro nga ang nasambit nga assistance ang sandig sa mga katuyuan sang foreign policy ni Trump.
Una man nga ginpahayag ni US Secretary of State Marco Rubio nga matabo lamang ang tanan nga US spending sa iban nga pungsod kun nahimo na nga mangin mas mapag-on, mas luwas kag mas mauswag na ang Amerika.
