Roxas City- Personal nga nagdangup sa Bombo Radyo Roxas si Aldrin Glodove tumandok sang Cebu City, apang nakapangasawa sang taga Dao Capiz, agud magpangayo sang bulig angut sa iya duha ka mga utod nga yara sa Saudi Arabia nga ginpahayag wala ginpaguha sang ila employer.
Suno kay Glodove, 5 na ka adlaw nga nagapabilin sa ila ginatrabahuan sanday alyas Shiela 40-anyos kag alyas Mariafe 43-anyos matapos ginpa-untat sila sa pagtrabaho sang ila employer.
Mahibaluan nga masobra 3 na ka tuig nga nagatrabaho ang iya mga utod sa Workforce Saudia nga kompanya kag ini ang labing una nga natabo nga ginpa-untat sila sa pag-trabaho kag wala ginswelduhan.
Magluwas kanday Mariafe kag Shiela, may 7 pa ka mga ka-updanan sila nga ginpa-untat man sa pagtrabaho.
Bangud sini, ginakabalak-an ni Glodove ang pagkaon sang iya mga utod bangud kun maubos ang ila stocks nga pagkaon wala na sila sang sarang makuhaan.
Sa karun nagapangabay ini nga mabuligan nga makaguha sa amu nga kompanya ang iya mga utod kag makasaylo sa iban nga trabaho ukon makapa-uli sa Pilipinas agud maka-apply sa panibag-o nga agency.
