ROXAS CITY – Liwat nga igapatuman sang Land Transportation Office (LTO) ang pagpatigayon sang mandatoryo nga vehicle inspection sa Private Motor Vehicle Inspection Center (PMVIC) antes maka-renew sang lisensya, sumugod sa Lunes, Oktubre 18, 2021.
Ini ang ginkumpirmar ni Mrs. Maria Lourdes Casipe, chief sang LTO-Roxas, sang mainterview sang Bombo Radyo.
Suno diri, sandig sa memorandum nagikan sa Department of Transportation (DOTr) kadam-an sa mga lugar sa pungsod ang may yara na sang PMVIC, rason sa liwat nga pagpatuman sang light vehicle inspection.
Paathag ni Casipe nga ang mga tricycle owners ang mahimo makapili kun sa Private Emission Testing Center (PETC) ukon sa PMVIC sila magapa-inspect.
Ginpasalig man sini nga wala sang pagbag-o sa rekisitos kag sa pagsuloktan.
Matandaan nga ginbawi ang mandatoryo nga vehicle inspection sang tinalikdan nga bulan sang Agosto, sini nga tuig.
Sa pihak nga bahin, nagpaandam man si Casipe sa mga motorista nga nagagamit sang open muffler, bangud seryoso ang kampanya sang LTO batuk sa iligal nga buluhaton kag ginpasiguro nga may yara sang nagakaigo nga penalidad sa bisan sin-o nga magalapas sa nasambit nga pagsulondan.
