ROXAS CITY – Sampaw-sampaw nga kaso ang pagaatubangon sang vendor nga nadakpan sang kapulisan sang Roxas City Police Station matapos naggabot sang kutsilyo sa pulis kag nakuhaan pa sang 45 ka sachet sang ginapatihan shabu.
Ang arestado amo si alyas Florencio, 44 anyos, kag residente sang Barangay Tiza sa syudad sang Roxas.
Sa interview sang Bombo Radyo kay Police Chief Master Sergeant Ramil Arcangeles, Spokesperson sang Roxas City Police Station, iya ginpahayag nga nagpondo ang mobile patrol sang kapulisan sa Barangay Punta Tabuc kag gilayon nagdalagan ang mga lalaki nga naga-standby sa lugar sa diin indikasyon nga posible may ginahimo nga indi maayo.
Suno kay Arcangeles, nabilin lamang si Florencio nga wala makapalagyo kag sang ginpalapitan sang pulis, gilayon ini nga naggabot sang kutsilyo.
Gindakop siya sang mga pulis kag narekober sa iya ang isa ka pouch kag pakete sang sigarilyo nga may unod nga mga suspected illegal drugs.
Dugang pa sang natungdan, gin-ako mismo ni Florencio nga nagagamit ini sang shabu.
Magapangatubang ang lalaki sang kaso nga paglapas sa Section 11 sang Republic Act 9165 ukon Possession of Dangerous Drugs, direct assault on an agent in authority kag Batas Pambansa Bilang 6.
-INTERVIEWED BY: Bombo Jessa Mae De Los Santo
