Nagpahayag sang kahandaan si Vice President Sara Duterte nga magpunko bilang presidente pananglitan nga magpanaog sa pwesto si President Ferdinand Marcos Jr. bangud sa mga wala untat nga kurapsyon nga nagakatabo sa pungsod.
Dugang pa sini, indi na kinahanglan pa nga pamangkuton ang iya nga kahandaan bangud napakilala niya na ang iya nga kaugalingon sang nagdalagan siya bilang Vice President sang pungsod kun sa diin sandig sa layi, siya ang nakahanay nga magabulos sa presidente.
Ginsiling pa sang Vice President nga may yara ini sang ginsumpaan nga kinahanglan nga depensahan kag ipreserba ini sa ano man nga pamaagi.
Handa man nga updan ni Duterte si President Marcos nga magpaidalom sa drug test para maathagan ang mga alegasyon nga ginahaboy batok sa iya nga siya ang nagagamit sang iligal na droga.
Madumduman, nga una na nga ginsiling ni Palace Communications Undersecretary Claire Castro, nga kaangay mga supporters ni Duterte ang makusog nga nagapanawagan nga magbuya sa puwesto si President Marcos para makapungko sila sa puwesto.
