Ginpaidalom sa Yellow Alert ang Visayas Grid kagab-i, Enero 20.
Suno sa National Grid Corporation of the Philippines ukon NGCP, ginapatuman ang Yellow Alert kun mas nubo ang suplay sang kuryente kumpara sa kinaangdan nga mga adlaw ini bangod sa pagnipis sang reserba.
Sa interview sang Bombo Radyo Roxas kay Mr. Reagahn Alcantara, Lead Specialist sang Public Relations Department sang NGCP, iya ginpahayag nga ang available capacity sang Visayas Grid amo ang 2,403 megawatts, samtang ang peak demand nag-abot sa 2,284 megawatts.
ang pila ka ginalantaw nga mga rason sang pagsaka sang alert status amo ang forced outage sa Unit 1 sang Therma Visayas, Inc. coal-fired power plant nga may kapasidad nga 169 megawatts, kag sa Unit 2 sang Panay Energy Development Corporation nga may 83.7 megawatts.
Ginklaro ni Alcantara nga ang Yellow Alert wala nagakahulugan nga may gilayon nga brownout, kundi isa ini ka indikasyon nga nag-nubo ang operating margin sang grid.
Dugang pa niya, padayon ang koordinasyon sang NGCP sa mga Generation Companies kag Department of Energy (DOE) agud masiguro nga indi maapektuhan ang suplay sang kuryente sang mga konsyumer.
