ROXAS CITY, CAPIZ- Arestado ang isa ka vlogger gikan sa probinsya sang Iloilo matapos ginpakamalaut ang National Bureau of Investigation (NBI) Capiz District Office sa social media.
Ang wala na ginhingadlan nga suspetsado, ang ginpadal-an sang ‘subpoena’ sang NBI bangud sang reklamo nga libel kag estafa batok sa iya.
Sa interview sang Bombo Radyo kay Agent John Katipunan, Executive Officer sang NBI-Capiz, iya ginpahayag nga ang amo nga subpoena ang ginpadala sa akusado bangud nga may nagpasaka sang kaso nga estafa kag libel batok sa iya.
Dugang pa sini, ang amo nga kaso nag-umnpisa sa isa ka palpak nga transaction sa isa ka event sa probinsya sang Capiz.
Apang, kaangay nga ginbastos kag ginpakamalaut sang amo nga vlogger ang talatapan sang National Bureau of Investigation-Capiz sa social media rason nga gin-aresto ini sya sa Iloilo sang mga katapo sang amo nga talatapan pamaagi sa isa ka warrantless arrest.
Pahayag ni Agent Katipunan, ang warrantless arrest sarang nga magdakop sa subject kun bag-o lang sini natapos ang ginabuhat ukon ginapatigayon palang sang amo nga persona kag mapaidalom ini sa reglementary period.
Sa karon, nagapadayon ang maid-id nga imbestigasyon sang mga katapo sang NBI Capiz para sa nakaigo nga disposisyon.
Mensahe naman sini sa mga social media Influencers nga mangin sensitibo sa mga tinaga nga ginamitlang labi na sa social media kag panumdumon sang maayo kun may maayo nga impluwensya ang ginahimo ukon wala agud nga makalikaw sa kun ano man nga kaso ang posible nga ipasaka sa mga ginasamad pamaagi diri.
Interviewed by Bombo Francis Biñas
