Trending sa social media ang isa ka vlogger sa Guangdong, China matapos sini gin-share ang proseso sa pagkuha sang 191.73 grams nga ginto halin sa daan nga SIM cards kag iban pa nga electronic waste.
Gamit ang komplikado nga mga proseso sa kemikal pareho sang mabaskog nga pagtunaw sang asido kag pagnubo sang electrolytic, nahimo niya nga “matunaw” ang mga tipik agud makuha ang ginto nga nagabili sang kapin sa 120,000 yuan (ukon ginabanta P950,000). Ang proseso ginatawag nga “SIM alchemy”. Bangud sini, madamo nga mga netizens ang luyag magtilaw sang proseso agud magmanggaranon.
Apang ginklaro sang mga eksperto nga “too good to be true” ang nasambit nga video kun ikonsiderar nga gikan lang ini sa ordinaryo nga SIM cards. Ang aktwal nga ginto nga unod sang isa ka SIM card tuman ka manubo (0.47 mg), gani kinahanglan ang mga 400,000 ka mga pidaso agud makuha ang kadamuon sang bulawan nga ginapakita.
Gin-ako man sang ulihi sang vlogger nga naggamit siya sang mga gold-plated computer chips gikan sa mga elektroniko nga mga bahin pareho sang mga kompyuter sa sulod, mga cell phone, ukon mga server nga ginpalibutab sang manipis nga layer sang bulawan.
Nagpaandam ang mga otoridad batok sa pagtilaw sini sa balay bangud nagagamit ini sang mga kemikal nga makahililo kag makatalagam sa ikaayong lawas kag sa palibot.
