Ginklaro subong nga adlaw ni Vice President Sara Duterte nga wala sila nag-apply para sa interim release sang iya amay nga si anay Presidente Rodrigo Duterte sa Australia.
Kasunod ini sang pagpamalibad sang gobyerno sang Australia nga batunon ang temporaryo nga kahilwayan sang anay presidente kag wala na nila ginakonsiderar ang pag-host sa anay presidente.
Ang bise presidente nagsiling nga ang iya defense team wala gid nakapakig-angot sa gobyerno sang Australia.
Dugang pa niya nga ang Australia wala nalakip sa duha ka pungsod nga ginhingadlan sang defense team para sa dinalian nga pangabay para sa interim release sa atubang sang International Criminal Court.
Ginpahayag nga nakabaton siya sang sulat gikan sa gobyerno sang Australia nga nagasiling nga indi nila pagbatunon ang iya amay.
Madumduman nga nagpadulong sa Australia ang bise presidente sang nagligad nga mga inadlaw agud makigsapol sa komunidad sang mga Pilipino didto.
Ginpahayag nga luyag sini nga makigkita sa Australian Foreign Minister Penny Wong sa Hunyo 23 apang bangud sa kakulang sang tion, indi ini mahimo.
