Personal nga nagtambong subong nga adlaw, Setyembre 16 si Vice President Sara Duterte sa hearing sang House Committee on Appropriations kaangot sang ginaplano nga P902.8 milyon nga budget sang iya talatapan para sa tuig 2026.
Ginhiwat ang deliberasyon sa lower House, kun sa diin gintalakay ang alokasyon sang pondo para sa Office of the Vice President (OVP).
Matandaan nga gin-reschedule ang hearing pagkatapos nga wala magkadto si VP Duterte sang nagligad nga semana, rason para indi pag idayon sang komite ang orihinal nga schedule.
Sang Setyembre 12, wala nagtambong si Vice President Duterte ukon bisan isa ka Undersecretary sa una nga natalana nga hearing
Sa baylo, ang assistant secretary lamang ang ginpadala sang OVP, apang wala ini ginbaton sang komite bilang iya nga representante.
Suno sa mga mamamalidha, tradisyon na sa Kamara nga ang pamuno sang ahensya ukon isa ka undersecretary ang dapat mag-atubang sa budget hearing.
Bangud sini, nagpaguwa sang pahayag ang OVP nga nagasiling nga handa na tani magtambong si VP Duterte sang Setyembre 12, pero ginpahibalo sila sang sponsor sang budget nga indi na magpadayon pagkatapos nahibaluan nga wala sang undersecretary nga makaupod.
Ang OVP nagapangayo sang P902.8 milyon para sa tuig 2026, mas mataas kun ipaanggid sa P744 milyon nga alokasyon subong nga tuig.
Suno sa opisina, ang dugang nga pondo gamiton para sa pagpalapad sang mga programa kag serbisyo sang OVP.
Ini ang una nga pagbisita ni Vice President Duterte sa Kamara halin pa sang Nobyembre 2024, sang ulihi siya nagtubang sa isyu sang ginadudahan nga pag-abuso sa pondo sang iya opisina.
Ang mga alegasyon amo ang nangin kabahin sang basehan sa impeachment case nga ginpasaka batok sa iya sang pila ka mga mamamalidha.
VIA BOMBO SAIRA JOY ALU-AD BAUTISTA
