Nabuko ang ginhimo nga paggamit sang Department of Education (DepEd) sa idalom sang pagpamuno ni Vice President Sara Duterte sang sertipikasyon gikan sa Armed Forces of the Philippines agud mahatagan sang panabaton ang paggamit sini sang confidential fund apisar nga wala man sang may ginpapanaog nga pondo sa ila.
Ini ang nagguwa sa hearing sang House committee on good government and public accountability sang istoryahan ang P15 milyon nga balor sang confidential fund nga gingamit nga pambayad sang mga impormante.
Gin-usisa ni Batangas 2nd District Rep. Gerville “Jinky Bitrics” Luistro ang mga opisyal kag retirado nga opisyal sang AFP angut sa ginpaguwa sini nga sertipikasyon nga gingamit sang DepEd sa liquidation sang P15 milyon sang confidential fund sini.
Suno kanday retired Maj. Gen. Adonis Bajao, Lt. Col. Carlos Sangdaan Jr., kag Colonels Manaros Boransing kag Magtangol Panopio ang sertipikasyon ng angut sa Youth Leadership Summits (YLS) nga ginpaguwa sang 2023.
Ginpanginwala sang apat nga nakabaton sila sang pondo halin sa DepEd para sa YLS. Ginkumpirma naman ini ni retired Gen. Nolasco Mempin nga anay Deped Undersecretary.
Agud mangin maathag, ginpamangkot liwat ni Luistro si Mempin kun wala sang ginbalhin nga kwarta ang DepEd pakadto sa AFP para sa YSL, ginsiling sini nga wala.
Suno kay Mempin wala man ini kabalo nga gamiton ang mga sertipikasyon agud pamatud an ang pagbayad sa mga impormante.
Sabat naman ni Boransing nga ang YLS ang ginagastusan sang Philippine Army kag mga lokal nga gobyerno.
Dugang pa ni Luistro ang kinaiba sang sertipikasyon nga ginsumite sang DepEd kag ang pahayag sang mga opisyal sang suldado.
Ginkumpirma naman ni COA representative Atty. Gloria Camora nga ang P15 milyon ang kabahin sang P75 milyon nga confidential fund nga ginpaguwa sang COA sang notice of disallowance bangud sa kakulangan sang mga dokumento nga makapamatuod sang ginhimo nga paggastos.
Sa nakaligad nga hearing, gin-usisa ni Surigao del Sur 2nd District Rep. Johnny Pimentel ang paggamit sang P112.5 milyon nga confidential fund para sa seminar ilabi nga gamay lamang ang nagtambong diri. Nagguwa sa nasambit nga hearing nga ang special disbursing officer sang DepEd nga si Edward Fajarda ang responsable sa P75 milyon nga cash advance halin sa confidential fund.
Ang sertipikasyon halin sa mga suldado ang gingamit agud mahatagan sang panabaton ang paggastos sini.
