Ginhangkat ni Vice President Sara Duterte sanday anay House Speaker Martin Romualdez kag anay Congressman Zaldy Co nga ituad ang responsable sa anomalya sa flood control projects.
Suno kay VP Sara, dapat magsugid sang matuod sanday Romualdez kag Co, indi lang para sa ila kaugalingon kundi para sa Pilipinas.
Ginpahayag man sang bise presidente nga wala nagasanto ang ginahambal sang duha sa ginpagwa nga report sang Ombudsman, nga ginapahayag nga nagatudlo sa ila bilang mastermind sa korapsyon sa mga DPWH flood control projects kag sa national budget.
Matandaan nga una na nga ginsiling ni Co nga ginsugo siya ni Presidente Ferdinand Marcos Jr. nga pasulodlon ang ₱100 billion nga proyekto sa 2025 National Budget.
Ginpanginwala naman ni Romualdez ang alegasyon kag nagsiling nga ang pagtukod sang national budget nagasugod sa ehekutibo, indi sa Kamara.
