Ginpahayag ni Vice President Sara Duterte nga ang administrasyon ni Presidente Ferdinand Marcos Jr. ang gin-alegar nagkunsabo sa International Criminal Court (ICC) nga ipa-aresto ang iya amay nga si anay Presidente Rodrigo Duterte may kaangtanan sa mga krimen batuk sa katawhan may kaangtanan sa iya ‘war on drugs’.
Sa iya speech sa Free Duterte Now rally sa The Hague, ginpanindugan ni VP Duterte nga may yara sang politikal nga motibo sa likod sang pagdakop sa iya amay sang Marso 11 sa Pilipinas. Suno sa iya, ang ICC kag ang karon nga administrasyon nagkunsabo sa pagpahalin sa eksena sang anay presidente, nga isa sa pinakamabaskog nga mga kritiko sang PBBM.
Suno sa iya, wala sang bastante nga basehan para sa pagkakulong sang iya amay sa Scheveningen Prison sa The Hague kag nga ang mga akusasyon sang extrajudicial killings (EJK) kag nabase lamang sa mga huringhuring.
Ginpabilin man sini nga ang ICC nagapasilabot sa pagdumala sang Pilipinas kag may kaugalingon nga “agenda” agud mamentinar ang suporta kag pondo halin sa luwas sang pungsod.
Samtang, nagpamalibad naman nga maghatag sang komento si ICC spokesperson Fadi El Abdallah sa mga pahayag ni VP Duterte, nagapanindugan nga isa ka judicial institution ang ICC kag dapat i-refer sa mga judges sang korte ang anuman nga isyu.
Gin-akusahan man ni Sara Duterte si Presidente Marcos nga nagapakuno-kuno nga mabuot sa publiko.
Gindugang sini nga wala siya sang nakita nga madinalag-on nga mga proyekto sang karon nga administrasyon.
Padayon nga nagapanawagan ang Bise Presidente para sa gilayon nga paghilway kag pagbalik sang iya amay sa pungsod, kadungan sang pag-assert sang kinamatarong sang mga Pilipino nga magdesisyon para sa ila pungsod.
