Bombo Jessa nakaagi kana bala hulat sang madugay sa isa ka waiting shed samtang nagatagiti ang init? Grabe imo balhas nu?
Didto sa Barangay Poblacion sa Mapandan, Pangasinan pinasahi bangud indi na mangin problema sang mga pumuluyo nga maghulat sang masakyan sa ila waiting shed apisar mainit ang panahon bangud…. ang waiting shed ang may yara sang aircon!
Suno sa report, pila ka mga senior citizens ang nakit-an sa sulod sang waiting shed kag nalipay sa proyekto sang lokal nga gobyerno.
Magluwas sa mga tigulang, ginahatagan man sang prayoridad ang mga nagabusong kag Persons with Disabilities (PWDs) nga makagamit sang air-conditioned waiting shed.
Nalipay man ang mga estudyante nga samtang nagahulat sang masakyan, mapatugnaw anay sa sulod sang waiting shed.
Nahibaluan nga tubtob sa 20 ka tawo ang kapasidad sang nasambit nga waiting shed.
Ginapahayag nga nagabalor sang P500,000 ang waiting shed nga ginkuha sa 20 percent nga development fund sang lokal nga gobyerno. Sa ikaduha nga hugnat sang proyekto, pagabutangan pa gid ini sang solar panel nga nagabalor sang P200,000 tubtub P300,000 agud makakinot sa konsumo sang enerhiya.
Bukas ang waiting shed halin alas 6 sang aga tubtob alas 10 sang gab-i.
Ti ikaw Bombo Jessa gusto mo man nga may airconditioned waiting shed kita diri sa Capiz?
