SIGMA, CAPIZ – Ginpadangat sa ospital ang mga pilason nga sakay sang Rescue Vehicle sang Dao Municipal Disaster Risk Reduction Management Office (MDRRMO) matapos nga maaksidente sa National Highway sang Barangay Amaga, Sigma, Capiz.
Sandig sa inisyal nga imbestigasyon sang Traffic Section sang Sigma Municipal Police Station nga samtang ginasubay sang driver sang nasambit nga salakyan nga si Jun Siwala, 28-anyos kaupod ang duha ka mga responders nga sanday Shiela Mae Flores, 29-anyos kag Christy Mendoza, 30-anyos nga lunsay mga residente sa banwa sang Dao, sang aksidente nga nadulaan sang kontrol sa manobela ang driver rason nga bumaliskad ang amo nga salakyan kag nakabunggo sa naga-park nga Toyota Fortuner nga gina panag-iyahan ni Ricky Benesio, 45-anyos, anay OFW kag residente man sang amo nga lugar.
Nahibaluan nga nagikan ang Rescue Vehicle sa Roxas City Airport kag padulong sa banwa sang Dao sakay ang ginapatihan walo (8) ka mga Locally Stranded Individuals (LSI’s) kalakip ang isa ka lapsag.
Bangud sa aksidente, nag-angkon sang pagpanalakit sa lawas kag menor nga mga samad ang pila ka mga sakay sang salakyan nga madasig nga ginpadangat sa pinakamalapit nga ospital nga ginalakipan sang driver, duha ka mga responders kag ang apat ka mga LSI’s kalakip ang nasambit nga lapsag.
Maswerte naman nga wala sang naangkon nga samad ang driver sang naka-park nga salakyan kag ang apat ka mga LSI’s ang igapaidalom sa Home Quarantine.
Sa karon nagapabilin sa kustodiya sang Sigma MPS ang duha ka mga salakyan samtang nagapadayon pa ang imbestigasyon matapos ang nagluntad nga aksidente.
