Kasunod sang duha ka magkasunod nga kaangay dismayado nga hampang subong nga semana, balik na sa winning column ang 2022 NBA champion Golden State Warriors matapos sini nga nalutos ang Detroit Pistons.
Matandaan nga magkasunod nga napaslawan ang Wariors sa nangin hampang sini sa Sacramento Kings kag Miami Heat kun sa diin gintambakan sang duha ka nasambit nga grupo ang Golden State.
Sa nangin hampang sang Warriors kag Pistons, nahimo sang GS nga punggan ang comeback attempt sang Pistons sa ulihi nga quarter kag ginposte ang tatlo ka puntos nga daog, duha diri ang nagikan sa ulihi nga free throw ni Stephen Curry.
Ang kadalag-an sang Warriors ang sa pihak pa sang kaangay off-night sang NBA superstar nga si Stephen Curry.
Gintestingan ni Curry nga magbuhi sang 21 shots apang lima lamang ang nahimo sini nga maisulod. Nagikan sa 21 shots, 14 diri ang mga 3-pointer kag duha lamang diri ang nakasulod.
Sa kabug-usan nga hampang, nagdangat lamang sa 17 points ang nahimo ni Curry kag may napulo man ini nga rebounds.
Liwat man nga naghimo sang double-double performance ang sophomore nga si Trayce jackson-Davis: 14 pts, 10 rebs.
Sa bahin sang Detroit, nanguna si Cade Cunningham nga nakapuntos sang 32 points sa kabug-usan nga hampang samtang 21 points naman ang nangin ambag sang guard nga si Malik Beasley.
Ang kadalag-an sang Warriors amo ang ika-19 nga daog sini subong nga season samtang naghabok na sa 18 ang natilawan sini nga pagkapiyerde. Hawid naman sang Pistons ang 19 – 19 win-loss record.
