ROXAS CITY – Dead on arrival ang isa ka welder nga lalaki matapos ginbuno sang iya katrabaho sa isa ka edipisyo sa Barangay Lawaan, Roxas City.
Ginkilala ang biktima kay Jobert Castillo Manuguid, sa legal nga pang-edaron kag residente sang Purok Tapulanga Hills, Phase V, Negros Occidental.
Samtang ang suspek ang ginkilala kay Randy Dizon, helper, sa legal nga pang edaron kag residente sang Piña, Maayon, Capiz.
Sa impormasyon nagikan sa Roxas City PNP, alas-11:50 kagab-i nagpabalhag si Charlie Parlocha nga isa man ka welder kag ginpahayag may nagluntad nga bun-anay sa nasambit nga barangay.
Suno kay Parlocha nga nakita niya ang suspek nga nagahana buno sa biktima rason nga iya ini ginsinggitan kag gilayon naman nga nagdalagan palayo ang suspetsado.
Sa bahin naman sang helper nga si Richel Pama Dawatan nga mga alas 10:20 sang gab-i nagsulod ang biktima sa sulod sang iya barracks agud ibalik ang cellphone, matapos sini nagguwa ang biktima kag pila ka minutos iya nabatian ang mabaskog nga tunog sa guwa.
Bangud diri, nagguwa si Dawatan kag nakita ang duguon na nga biktima rason nga nagpangayo siya sang bulig sa iya kaupdanan.
Gindala pa si Manuguid sa pinakamalapit nga ospital apang gindeklarar nga DOA sang attending physician takna 12:03 kaina sang magaaga matapos mag-angkon sang buno sa nawala nga bahin sang dughan kag tiyan.
Nahibaluan sang nagligad nga mga inadlaw nagluntad ang argumento sa tunga sang suspek kag biktima angut sa ila matuod nga address.
Nagapadayon sa karon ang imbestigasyon sang kapulisan, samtang gina-ayam si Dizon nga nakapalagyo.
