ROXAS CITY – Gindeklarar nga overall champion ang Western Visayas sa bag-o lang tapos nga National Private Schools Athletic Association (PRISAA) 2023 nga ginhiwat sa Zamboanga City.
Malipayon nga ginpakibaghin sang Western Visayas Private Schools Association (WVPRISAA) Liason Officer for Cultural nga si Mark Salvador kag Technical Committee Sports Coordinator Melinda Lopez, ang nasambit nga kadalag-an kun sa diin napabilin sang Secondary Level ang kampeonato sa sulod sang 5 katuig samtang 3 consecutive years naman nga nagkampeon ang Tertiary Level.
Suno kay Salvador, indi nangin madali ang kampanya sang mga atleta sang Western Visayas agud mapabilin ang kampeonato ilabi na nga wala sang PRISAA nga natabo sa sulod sang duha ka tuig bangud sa pag-igo sang pandemiya.
Sa sulod sang 2 ka bulan nga training, makit-an gid suno diri ang dedikasyon sang mga atleta nga makahatag sang bugal sa ila buluthoan kag kaugalingon.
Mahibaluan, nga sa probinsya sang Capiz, 16 ka mga atleta ang nagpasakup sa kompetisyon, sa nagkalain-lain nga patag kaangay sang Athletics, Taekwondo kag Oration.
Sa kabug-usan ang Western Visayas Secondary Level ang nakatipon sang 113 gold, 47 silver kag 29 bronze.
Samtang sa bahin sang Tertiary Level, nakatipon sang 96 gold, 36 silver kag 45 bronze.
Tuman naman ang pagpasalamat nanday Salvador kag Lopez sa mga nagsuporta sa WV ilabi na sa delegado sang Capiz.
