Padulong na sa China ang national women’s futsal team sang pungsod nga “Filipinas”.
Magapaindis-indis ang national team sa 2025 AFC Women’s’ Futsal Asian Cup nga pagahiwaton sa Hohhot, China sa Mayo 6 tubtob 18.
Kadungan sini, ginlunsar sang Philippine Football Federation (PFF) ang opisyal nga ngalan sang futsal team sang pungsod kag ini amo ang “FILIPINA5”.
Samtang ang men’s futsal team ang magapabilin sa Philippine Men’s National Futsal Team.
Ang Spanish head coach nga si Rafa Merino Rodrigo ang magapanguna sa 15 ka mga miyembro sang “Filipina5.”
Ang women’s futsal team ang yara subong sa ika-55 nga ranggo sa kalibutan, sa diin yara sila sa Group B nga may world number 9 Iran, number 11 Vietnam, kag world number 29 Hong Kong.
Ang Iran ang nangin kampeon sa AFC sang 2015 kag 2018 samtang ang karon nga kampeon sa Southeast Asian amo ang Vietnam.
Una nga maga-atubang ang FILIPINA5 sa Iran sa Mayo 7 takna alas 11 sang aga samtang masunod naman nga maga-atubang ang Vietnam sa Mayo 9 kag Hong Kong sa Mayo 11.
