ROXAS CITY – Nagbaton sang magkatuhay nga reaksyon ang mainit nga pagbayluhanay sang tinaga sang duha ka mga city councilors sa Roxas City sa social media site nga Facebook.
Ang nasambit nga ‘’word war’’ nanday City Councilor Julius Abela kag City Councilor Powel del Rosario sa Facebook ang nag-ugat kasunod sa madamo nga mga komento kag reaksyon sa ginpatuman nga odd-even traffic scheme sa mga tricycle nga nagabiyahe sa syudad sang Roxas nga gilayon ginbawi matapos ang apat ka adlaw nga pagpatuman sini.
Nagkomento si Abela sa post sa FB ni del Rosario nga nagpahayag sang pagkadismaya sa gilayon pagpapasar kag wala pagkunsulta sa publiko sang ginpatuman nga odd-even traffic scheme.
Kasubong nga ginakwestyon kag ginapahanumdum pa ni Abela sa iya comment si del Rosario nga dry run pa lamang ang ginapatuman nga traffic scheme, apang may palagas pa nga sugilanon nga temprano pa sa anuman nga plano sini sa pulitika.
Nagsabat naman sa komento ni Abela si del Rosario kag ginsuhestyon nga liwat basahon ni Abela ang iya nga post para mangin maathag diri nga wala siya nagapamulitika sa baylo nagapahayag lamang sang sentimyento bangud madamo sang mga tricycle drivers ang nagareklamo nga dugang nga huol kag kabudlayan ang dala sini sa ila nga palangabuy-anan ang odd-even traffic scheme.
Samtang matapos pyestahan ang word war sang duha ka mga konsehal, gindula ni city councilor Julius Abela ang iya nga post sa FB.
