Masaksihan na sang mga Capiznon ang world-class nga hampang sa Roxas City Invitational Basketball Tournament nga pagahiwaton sa Agosto 21 tubtob 26 sa Dinggoy Roxas Civic Center.
Sa interview sang Bombo Radyo kay Melvin Galagate, Head sang Roxas City Communications Group, iya ginpahayag nga indi lamang national kundi international man ang lebel ang amo nga tournament bangud may mga import kag isa ka team kag may yara man nga team ang gikan Australia nga magapakigbahin sa kompetisyon.
Suno kay Galagate, paagi sa sports, ginatinguhaan sang syudad nga mapalapnag ang turismo kag mas mapakilala pa ang Roxas City.
Dugang pa sang natungdan, may mga team na nga nag-abot sa syudad para magpartisipar sa amo nga tournament.
Nagalaom man ini nga ang aktibidad magahatag sang kalipayan kag world-class nga basketball experience sa mga tumalan-aw, ilabi na sa mga basketball enthusiast sa syudad.
