Ginpaathag sang International Tennis Integrity Agency (ITIA) kun ngaa wala nila ginpapanaugan sang suspension si world number 1 tennis player Jannik Sinner matapos nga nagpositibo ini sa ginadumilian nga substance.
Suno sa ITIA nga wala nila nakit-an nga nagapabaya ang French tennis star apisar nga nagpositibo ini sa Clostebol nga isa ka anabolic steroid.
Una nga nagguwa ang resulta sadtong Marso 10 matapos ang Indian Wells tournament.
Matapos naman ang walo ka adlaw, nagtipon sila liwat sang samples kag nagguwa nga positibo apang sa manubo lamang nga level ini sa karon.
Nakuha suno diri ang pagpositibo pinaagi sa contamination sa bulong sang iya nga physiotherapist.
Ginpahayag nga mabulog ang physio ni Sinner pinaagi sa over the counter spray sa iya nga panit para sa magagmay nga pilas.
Ginklaro man nila nga matapos ang pagguwa sang test, ginpapanaugan nila sang automatic provisional suspension si Sinner apang nag-apela ini kag nadiskubrehan nga nalapnan ukon na-contaminate lamang ini halin sa iya fitness trainer gani ginpadayon sini ang paghampang.
Ginpasiguro ni Sinner nga magatuman na ini sa anuman nga pagsulundan sa tennis community.
Si Sinner ang nagdaog sang lima ka titulo subong nga season kun sa diin sadtong Enero, nagkampeon ini sa Australian Open kag sadtong Hunyo, nagtaas ang ranking sini sa number 1.
