DAVAO CITY – Naghari ang WVRAA Secondary Boys Football squad sa Palarong Pambansa 2019 matapos ila ginlutos sa score nga 2-1 ang hubon sang Region 7 sa ila championship game sa University of the Philippines – Mindanao Sports Complex sa Davao City.
Una pa nga nakahimo sang goal ang Region 7 sa 1st half sang hampang apang ginbalusan ini ni Jaime Rosquillo sang WVRAA rasub nga napatas ini sa 1-1.
Sang second half, nag-arangkada ang Negrense nga si Gerhard Jens Moreno kag nakahimo sang goal para sa WVRAA agud makaabanse sila sang isa ka goal batuk sa Region 7.
Madamo nga beses man nga nagtinguha ang Cebuano squad nga makahimo liwat sang goal, apang ginpabudlayan sila sang husto sang mapag-on nga depensa sang WVRAA kag sang ila epektibo nga goalkeeper nga si Mark Anthony Bedia.
Suno pa sa coach sang WVRAA nga si Domingo Subo, ginhambalan niya ang mga western visayan footballers nga indi magpalingkang sang naunahan sila goal sang kasumpong kag magtutok lamang sila sa madasig nga counter attacking kag solido nga depensa.
Ginkalipay man ni Subo nga nakahimo sang krusyal nga goal si Moreno nga iya man ginganyat nga magpuntos bangud wala pa ini maka-goal sumugod sang naghampang sila sa elimination rounds.
Ang WVRAA squad ang ginakatapuan kalabanan sang mga estudyante naggikan sa Barotac Nuevo, Iloilo kag selections naggikan sa iban nga eskwelahan kag probinsya.
Ini ang liwat nga pagkampeyon sang WVRAA sa Football sa Palarong Pambansa sumugod sang katapusan nga nagkampeyon sadtong 2014 pinaagi sa hubon nga naggikan sa Negros Occidental.
