ROXAS CITY – May yara na sang tentative nga petsa ang patigayunon nga Western Visayas Regional Athletic Association (WVRAA) Meet 2020 sa probinsya sang Aklan.
Ini ang ginkumpirmar ni Department of Education (DepEd) Capiz Division Sports Coordinator Ronnie Reteracion sang ma-interview sang Bombo Radyo.
Suno kay Reteracion nga pagahiwaton sa Marso 21-28 ang nasambit nga regional sporting event.
Suno diri nga nagapadayon sa gihapon ang paghanas sang mga atleta sang probinsiya apisar natapos na ang ila school based training sadtong Pebrero 12.
Ginatugyan ni Reteracion sa mga trainers kag coaches ang paghanas sa mga kabataan nga yara sa mga kabanwahanan sa pihak nga nagabalik na ang mga ini sa ila nga klase.
Gindugang pa ni Reteracion nga tuman nga naapektuhan ang mga team sports sa pagpaiway sang nasambit nga hinampang bangud ang iban sa mga atleta ang gikan pa sa mga kabanwahanan.
Apang nakita naman sini ang dako nga bentaha sa mga co-individual events kun sa diin mapalawig pa ang ila nga paghanas.
Sa karon suno kay Reteracion ila ginaplanuhan ang pagpadulong sa ila nga billeting school sa Malinao, Aklan lima ka adlaw antes ang sporting event agud nga makahanas pa ang mga kabataan.
Samtang ginkumpirmar man ni Reteracion nga nabaton na sang mga atleta sa idalom sang Capiz Division ang ila nga mga allowances matapos ang ila nga school-based training.
