Nagpagwa sang pahayag si former Congressman Elizaldy “Zaldy” Co kasunod sang pagkadalahig sang iya nga pangalan sa anomalya sang flood control projects sang gobyerno.
Suno kay Co, wala sang kamatuuran nga yara siya sa likod sang kontrobersiya kag ini lamang ang ginahimo nga “scapegoat” ukon panakip-butas sa mas daku pa nga isyu nga gina-atubang sang administrasyon.
Ginpat-od ni Co nga naghalin siya sa pungsod sang bulan sang Hulyo agud magpaidalum sa medical check-up kag may plano na siya nga magpanumbalik pagkatapos sang State of the Nation Address ni President Ferdinand Marcos Jr.
Apang, antes pa siya nakabalik, nag abiso si anay House Speaker Martin Romualdez pinaagi sa telepono nga indi anay magpauli kag magpabilin anay sa guwa sang pungsod.
Ginpaathag pa ni Romualdez sa iya nga atipanon siya kag indi pagdalahigon sa isyu.
Pahayag pa niya, tungod sang iya pagsalig, nagpaukoy siya kag wala dayon nagpauli sa Pilipinas.
Suno pa sa iya, sang pag-umpisa sang bicameral process sang tuig 2024, ginpahayag ni Budget Secretary Amenah Pangandaman nganagmandu ang Presidente Marcos nga mag-insert sang P100 billion nga balor projects sa budget.
Dugang pa niya, indi na niya kaya nga magpaukoy lang kag handa na siya nga ibulgar ang tanan niya nga nahibaluan nga may resibo, ebidensya kag mga pangalan
Nagpanawagan man ang natungdan nga indi siya paghusgahan base lamang sa mga nagalutaw nga akusasyon samtang wala pa napamatud-an sa malimpyo nga pamaagi kag patas nga imbestigasyon.
